By PEN STING on
9/23/2011 10:53 PM
ادري بالاسابيع الاخيرة قللت كثيراً من الكتابة والصراحة الاسباب وايد بس اهم سبب ان اخبار التكنولوجيا صارت قضايا فقط وكل يوم شركة ترفع قضية على شركة ثانية والسالفة صارت ماصخة يعني مره ابل يرفع قضية على سامسونج ومره سامسونج يرفع قضية ومره جوجل تساعد سامسونج على ابل والسالفة شكلها مطوله لان فكرة الزين يفرض نفسه برأيهم صارت صعبه بالتسويق بهل ايام ولازم الشركات يستخدمون كل وسائل الشريفة وغير الشريفة بهل منافسة حتى وصلت القضايا لمنع بيع الاجهزة ببعض الدول
الحين خل اتفلسف عليكم شوي واقول رأيي بالموضوع, موضوع برأءت الاختراع وحقوق الاختراع سالفة جداً معقدة ومرات تخدم شخص معيين على حساب تطور تكنولوجيا يعني الي اخترع ال WWW (تيم بيرنرز لي)لو هل شخص احتكر هل اختراع بطريقة جشعة كان ماشفنا هل تطور الي العالم عايشين فيه الحين بس هل شخص رفض الاحتكار ودعم الانتشار بدون مقابل بس الي قاعد يصير الحين بين الشركات العملاقة نفس قصة كارتون bee movie لما رفعو قضية النحل ضد البشر ومنعو استخدام البشر للعسل وهل حركة سببت اختلال بتوازن الطبيعة واظن القضايا الي قاعد تصير نفس هل كارتون و راح تسبب اختلال بتوازن التطور التكنولوجي ,اهو حفظ حقوق الاختراع شغلة مشروعة بس مايصير تصل للافلاس وقضايا ومنع يعني اوكي تفاهمو على مبلغ معقول بس لا تمنع سير التكنولجيا
|
By PEN STING on
9/15/2011 11:57 PM
ادري وايد راح ينتقدوني علشان هل موضوع بس الحق لازم ينقال وبصراحة بعد مباراة برشلونة و ميلان تغييرت نظرتي بميسي لان لاول مره لاحظت ان ميسي تنقطع من عنده الكره بطريقة تبيين ان المدافعيين الي بالاندية الكبيرة مجرد عنف ولياقة بدنية عالية بدون خبرة حقيقة للدفاع وان نيستا اخر مدافع من المدافعين الكبار امثال مالديني وكانافارو(طبعاً كانافار يوفونتوس وايطاليا ومااقصد كانافارو مدريد )و لو الاندية الاسبانية او الاروبية عندهم مدافعين من طراز نيستا ,كان نظرتنا اختلفت بالنسبة لميسي ورونالدو , انا مااقول انهم ما يملكون مهارات , بالعكس هل لاعبين الافضل حالياً بالعالم بس عدم وجود مدافعين اهو سبب رئيسي لتألقهم و الي يقول ايام رونالدينو و رونالدو(البرازيلي) و زيدان وديل بيرو ماكانو يقدرون يسوون نفس الي يسويه ميسي ورونالدو هذه لان ايامهم كان الدفاع مالديني , كانافارو , نيستا, بانوجي , زامبروتا, كافو , تورام وغيرهم من المدافعين
شوفو الفيديو شلون نيستا يقطع الكره واهو عمرة 35 سنة
|
By PEN STING on
9/11/2011 7:29 PM
طبعاً اكيد لاحظتو اخر مواضيعي دايماً احاول احل مشاكل او اشرح امور الي قاعد يسئلوني عنها يومياً , بس المشكلة الي يسئلوني لما اقولهم ادخلو الموقع وشوفو الشرح يكون جوابهم احنا مشغولين ويبون زبدة الكلام بس مو مشكله انا راح اكتب اجوبة كل الاسئلة الي يسئلوني اياها بالتلفون , على امل يحن قلبهم بيوم ويشوفون موقعي او الاقي طريقة اخصم فلوس من تلفوناتهم(كان صرت مليونير )
ابتعدنا عن موضوع الي اهو مواصفات الجهاز المعلنة ليست كافية لتفوق جهاز على اخر , يعني لما تبون تشترون جهاز اكيد ملاحظين ان بعض الماركات نفس HP & ACER تقدم اجهزة من ناحية البروسيسر والهارديسك والرام والجرافيك وغيره بسعر اقل عن باقي الماركات الي نفس latitude lenovo t series & Dell ومرات يكون فرق السعر خيالي بس الحقيقة المؤلمة ان المواصفات على الورق تشبه بعض وبالاستخدام فرق خيالي
نبدأ بالبروسيسر
البروسيسر الشي الوحيد الي متشابة بجميع الشركات لان انتل (في حال كان البروسيسر انتل طبعاً) تصنع لكل الشركات بمستوى واحد بس لازم تلاحظون ان مرات يكون سرعة البروسيسر نفس الشي بس الاختلاف بالكاش ولاتستهينون بالكاش
الرام او الذاكرة اللحظية (يعني اعرف فصيح) بسبب انتشار اكثر من شركة بمجال تصنيع الرام , فلازم نتأكد االجهاز الي نبي نشتريه الرام الي عليه تصنيع اي شركة وهل معلومة نقدر نأخذ موديل الجهاز ونجييك بالمواقع الاجنبية واكيد ما شاء الله عليهم يكتبون هل معلومة لان الشركة المصنعة للرام لها تأثير مباشر على كفائة الجهاز
الهارديسك نفس الشي والسيدي روم والنتورك وكرت الشاشة والشاشة نفسها تنطبق عليهم قاعدة الرام
الحين السبب الي يكون سعر latitude lenovo t series & Dell اغلى من باقي الجهزة اهو القطع المستخدمة داخل الجهاز تكون دائم من افضل المصانع والشركات مثل ديل و لينوفو لما يجمعون هل اجهزة بهل موديلات يكون التصميم عالي الجودة ويضطرون يبعونه اغلى علشان القطع الي داخل ويعني لما تبي تقارن جهازين من شركتين مختلفين بس على الورق نفس المواصفات نفس لما تبي تقارن سيارة مرسيدس حوت فيها شاشة وسنسر و 6 سلندر مع شفر لومينا فيها شاشة وسنسر و6 سلندر(مع احترامي للشفر بس هل حركة عناد بواحد من الشباب الي يدخل يقرأ مواضيعي وينتقدني )
|
By PEN STING on
9/6/2011 8:07 AM
شكراً لفيفا على دعوة جميع المدونين لحضور المباراة
|
By PEN STING on
9/1/2011 4:15 PM
استقبل كثير من الاتصالات دائماً ويكون السؤال احاول اشغل الجهاز بس مايشتغل والباور سبلاي مافيه مشاكل او مرات اللابتوب شغال بس الكبيورد مو شغال وغيره كثير من الاعطال الي تصير بالهاردوير وعلى طول طبعاً يكون الحكم ان قطعة بالجهاز خربانه وتعال غير القطعة وادفع فلوس بس قبل لا تسوون اي شي لازم تعرفون معلومة مهمة ان اجهزة الكمبيوتر بعد الاستخدام لفترة يصير فيها شحنات كهربائية(مادري الترجمة صحيحة او غلط) او بمعنى الاصح نقولها ستاتيك وهل ستاتيك نفس الياهل الي قاعد تشوفونه بالصورة شلون هل ستاتيك يأثر على جسم الانسان وطبعاً تأثيره قوي على الكمبيوتر ولما يتشكل اطراف قطع الكمبيوتر يتسبب بتوقف القطعة او الكمبيوتر بالكامل بس هل توقف له حل سهل جداً ان لما يخرب عندك اي قطعة بالجهاز اول شغلة تسويها افصل الكهربا من الكمبيوتر بالكامل وحتى الكيبورد والماوس وكل الكيبلات الموصولة بالجهاز وانتظر ربع ساعه وبعدها شغل الجهاز , هل شغلة راح تمسح الستاتيك الموجود بالجهاز بس اذا كان الخلل بقطعة داخل الجهاز يعني مثل الرام او كرت الشاشة او غيرة ,لازم تشيل الرام او القطعة الي ماتشتغل من الجهاز و تمسح عليها بأيدك بالكامل وخليها ربع ساعه وجرب تركبها مره ثانيه على الجهاز ومرات يتكرر هل شي مع الناس وله اسباب وايد ,يمكن يكون خلل بالكيس الي ياُثر على القطع الي داخل الجهاز و يشحنهم بالشحنات الكهربائية الضاره او مرات الجهاز مكانه داخل البيت يتعرض لشحنات وايد وغيره وغيره من الاسباب وطبعاً انا هل موضوع بالكامل عن الستاتيك يعني مو تفهمون ان الكمبيوتر ما يخترب لا يخترب بس قبل لاتدفعون فلوس وتعدلون الجهاز , مايمنع تجربون الحلول الي قلتها
بالنسبة للابتوب افصلو الشاحن و الباتري عن الجهاز لمدة ربع ساعة وبعدها جربو تشغلونة علشان مشكلة الستاتيك
|
By PEN STING on
8/27/2011 12:40 AM
هل صورة معبرة جداً لان لما يطلبون من عندي ديزاين اقعد بالساعات اطالع الشاشة واتم ساكت وبالفترة الاخيرة للاسف ماطلع معاي ولا ديزاين و صارلي ايام قاعد نفس هل صورة
ادري سوالف وايد صارت بالايام الاخيرة وستيف جوبز طلع من منصبة وحولوه على قسم الارشيف يرتب ملفات واحلى شي بالموضوع لما اشوف كل المواقع كاتبين هل خبر ان ستيف جوبز طلع وعاد الكل يحلل على كيفة والكل ما شاء الله مادام عنده ايفون يعني لازم يفتي ويقول شنو مصير ابل!!!
احلى تحليل سمعته يقول ان لو ستيف جوبز راح نوكيا راح تصير مصيبه!!شكووووووو
وعاد الشغلة الثانية الي مالها حل اهي برشلونة ! ياجماعه تكفون خفو على العالم شوي ,انا اقترح نعطيهم الدوري والكأس وكل اللقاب من بداية الموسم ونقولهم مثلو ان الفريق الي ضدكم قادر ينافس ,قبل الناس يقولون برشلونة نفس البلاي ستيشن بس الحين المشكلة حتى بل بلاي ستيشن ماتضبط تلعب نفسهم , ادري الحين تقولون راح احسدهم بس صح اني احبهم بس ابي لما نطالع مباراة نحس ان في منافس
على العموم اعذروني مااكتب هل فترة لان رمضان وماكو وقت ولما بكتب شي لازم يفيد الناس مو بس هذرة على الفاضي
شي مضحك ان واحد دازلي واتساب اسعار ايفون 5 وجاهزين وللبيع !!!
شي مضحك ان لما تدخل تويتر (اكره تويتر) الكل يتباحثون بكل شي مع ان اظن فكرة تويتر مو تشات يعني واحد يقول جملة وماله داعي الكل يرد على الجملة ويعلق واهو يرد يبرر واهم يردون يعلقون واهو يرد يقول لا و اهم يبدون يسبونه وليش يسبونه ماادري يعني بتويتر الكل ينسب لو واحد سولف عن كرة القدم يسبونه لو عن التكنولوجيا يسبونه لو عن لعبة العنبر يسبونه وليش يسبونه ماادري ولا الغريب الي يسب تلاقيه ينصح ويدعي الهداية حق الشخص ويسبه ليششششششش ,يعني هل الهداية ان يصير نفسك ويسب العالم
ولا كل كلمة والثانية يقولون كلمة مثقف كمثال : انا مثقف اقرأ هاري بوتر , انا مثقف ادق هبان , انا مثقف اسمع بيتهوفن ,,, يامثقف هل تعلم شنو معنى كلمة مثقف
كلمة مثقف كان في قديم الزمان يقطعون اغصان الشجر ويسوون فيهم رمح بس علشان يكون الرمح سيدة ومن دون شوائب ,كانو اييبون غصن الشجر يحتفظون فيه داخل بايب مستقيم علشان يكون مستقيم ويتنظف من الشوائب وهل بايب يسمونه مثقف و هل عملية تمسى تثقيف لان يكون الغصن مستقيم وخالي من الشوائب وعاد مع مرور الزمن ودخول الاسلام , اطلق اسم المثقف على الناس الي يكونون ديينين وماعندهم سوالف يمين ويسار وخالين من الشوائب
بس الحين لو تكلم كلمتين انجليزي قالو مثقف !!!
|
By PEN STING on
8/18/2011 12:38 AM
سجل اليوم الاربعاء في الجولة الرابعة للدوري الايراني المحترف الكويتي في صفوف نادي استقلال الايراني الهدف الاول في مشواره مع الفريق وانتهت المباراة بفوز نادي استقلال الايراني 2-0 على نادي فجر سباسي وعلماً بأن نادي استقلال الايراني يحتل المركز الثاني بفارق الاهداف من المتصدر صبا قم
فيديو الهدف
|
By PEN STING on
8/13/2011 5:12 PM
هل نوع التصوير الي صارلهم فترة هابين في ربعنا الاجانب يعتمد على صورة تتقبل الاستمرار يعني المشهد يعيد نفسه بس ماتحس ان يكون متقطع ويكون استمرارة كحركة طبيعية بس علشان تصور او تسوي نفس هل نوع من الصور تحتاج فكرة واهي اهم جزء من الصورة لان يمكن تكون تعرف تسوي هل نوع من الصور بس الاهم من المعرفة تحتاج فكرة وتكون فيها ابداع وطبعاً لازم لما تتعلم اي شي تطبق اي فكرة حتى لو صغيرة علشان تتعلم من المشاكل الي تواجهك وانا بالبداية بصراحة طبقت الفكرة على اخوي واهو يطق طق بالتلفون لان هذه وضعه طول اليوم يعني لو سافر اظن نطالع الصورة الي سويتها و راح نحس ان بيننا وقلت خل اسوي الفكرة الي قاعد تشوفونها بس كان الموضوع جداَ صعب لان دخان المبخر صعب يكون لقطتين نفس الشي بس قلت اجرب حتى لو غلطت راح اتعلم شي يديد لان يقولون اديسون قالوله مو متحسف انك جربت اكثر من الف طريقة علشان تسوي الليت وفشلت وبس طريقة وحدة الي ضبطت معاك , رد عليهم قال لا بالعكس تعلمت الف طريقة ماتوصلك لصناعة الليت ,صح اديسون في شكوك حول ان اعاد تطوير فكرة عالم ثاني باختراع الليت بس بالنهاية هم يتم عالم وعالم كبير وزبدة الكلام شوفو الصورة الي سويتها واتقبل الانتقاد علشان اطور بالمستقبل بس لا اييني شخص بس يقول مو حلو يمشي والي عاجبته الصورة
خل ياخذها بس لا يحذف صورة اصبع ريلي الي بالصورة لان راح الاحقة بالمحاكم والمنظمات الدولية واظن اكبر غلطة بالصورة الدشداشة مو ضاربها اوتي
ملاحظة الصورة ثقيلة وايد يعني اصبرو شوي علشان تسوي لود
وتم التصوير بتلفون جالاكسي اس ٢ و التعديل الفوتوشوب
|
By PEN STING on
8/13/2011 1:55 PM
يقولون ان امازون قدمو طلب للحصول على براءة اختراع خاصة بوسادة هوائية او اير باغ او اير باج او AIR BAG (كتبتها بجميع الطرق علشان توصل الفكرة) للهواتف النقالة علشان لما يطيح الجهار راح يتبطل الاير باج ويحمي الجهاز من الكسر !!!! وللحين شلون يستشعر الجهاز ان قاعد يطيح فكرتة مو واضحة عدل لان يقولون باستخدام سنسر الي داخل الجهاز +برنامج يقعد يحسب تحركات الجهاز ولما يحس ان صار اختلاف سريع بالارتفاع راح يفهمها الجهاز ان قاعد يطيح و راح يتبطل الاير باج بس اظن هل فكرة او الاختراع راح يحتاج دراسة اكثر علشان يقدر يحسب الانذار الخاطئ او البلاغ الكاذب لان وايد تحصل يطيح التلفون وباخر لحظة تمد ريلك وتسكنة نفس الكرة (طبعاً هل حركة للشباب فقط وتكون بايام الاحد بسبب كثرة مشاهدة برشلونة) او لما تروح الغرفة بتنام وتغطه على السرير وغيره وغيره ,يعني عندنا وايد انذار كاذب ويمكن نفس اغلب السيارات بالحوادث مايبطلون ولما تقول حل الشركة ليش يقولك مو مسوي صيانة , على العموم كل اختراع له نقاط ايجابية وسلبية بنفس الوقت و وايد اختراعات ما مشى سوقهم بسبب السعر المرتفع وعاد خل ننطر ونشوف السعر
|
By PEN STING on
8/12/2011 1:24 AM
تمت دعوتي من قبل شركة فيفا لحضور الغبقة الي مسوينها فيفا حق المدونين وكان الحضور كبير للمدونين وتم خلاله سحب جائزة عبارة عن رحلة كاملة لمباراة المان يونايتد و تم توزيع بنهاية الحفل هدية لكل المدونين وهي
تلفون Huawei U8800 IDEOS X5 وشوي قريعان
وبصراحة كان تعامل جداً راقي من الاستاذة مي السبيعي من شركة فيفا ونقولها مشكورة وماقصرتي
واتشرفت بمعرفة بعض المدونين ومنهم لندني
وشكراً فيفا
ملاحظة :الاخ بوجاسم بما انك سويت نفسك تعبان وخليتني اروح بروحي فتحمل الي راح اسويه فيك مستقبلاً
|
By PEN STING on
8/11/2011 10:03 AM
صح ان شركة نوكيا راحت عليهم وقاعد يتعرضون لخسارة في الايام الاخيرة بس مازالو يحاولون وهل شي بصراحة يحسب لهم ان مازال عندهم امل وانا قلت من زمان واعيد واقول الحل ان ينزلون اجهزة بنظام اندرويد وهل شي راح يكون لصالح جوجل ونوكيا الي عندهم خبرة و وكلاء وموزعين يقدرون ينشرون الاندرويد اكثر واكثر بس اهم شي الحين لازم يغييرون نظام تشغيلهم الى الاندرويد
نرجع لموضوع الفلم القصير الي تم تصويرة بالكامل بهاتف نوكيا ان ٨ وانا مااشوف ان شي خيالي ان يتم تصويرة بتلفون بس الخيالي فكرة عرض قصة الفلم يعني لما يكون عندك كل هل فريق والتولز وتطبيق جميل للفكرة ,اكيد التصوير راح يطلع حلو حتى لو كان بكاميرا الحمرا الي اييبونها بأيام الحج قبل (مع ان ماتصور بس تعرض صور) بس ككل حالياً فكرة المنافسة بقوة الكاميرا صار شي قديم
طريقة تصوير الفيلم
|
By PEN STING on
8/8/2011 11:41 AM
السؤال طرحوه انتل بالفيديو الي راح اضيفة لكم و اظن هل سؤال ضروري جداً لان وايد استقبل اتصالات وبشكل يومي ان نبي نشتري جهاز بس ماندري شنو ناخذ وشنو المواصفات وطبعاً اسئلهم انتم شنو احتياجكم للكمبيوتر وتقريباً ٩٩٪ احتياجهم تصفح فقظ بس للاسف مايتقبلون النصيحة ان لازم ياخذون جهاز رخيص ومواصفات معقولة لان حرام الشخص يدفع مبلغ كبير على مواصفات اهو مايستخدم ولا راح يستخدمها وبالوقت الحالي اكثر الناس بعد انتشار الايفون واجهزة الاندرويد و الايباد والتابليت لاحظنا ان الناس ابتعدت عن اللابتوب و الكمبيوتر العادي لان بالاساس كان احتياجهم تصفح فقط وماكان له داعي يقطون هل فلوس على اللابتوبات باسعار خيالية ومواصفات خيالية والحين دخل على الخط النيت بوك او المشهور بالكروم بوك الي يعمل بنظام تشغيل جوجل كروم وانا شرحت فكرة الجهاز سابقاً
موضوعي عن الكروم بوك
|